خاليدس سعيدس

المقالة دى انا كنت كاتبها من اكتر من سنة .. وبالصدفة وانا بقلب فى اوراقى القديمة لفتت نظرى , ولقيت انها مناسبة جدا للى بيحصل دلوقتى
و إكتشفت انى ماكنتش بحلم .. انا كنت فى غيبوبة

<!–break–>

طبعا كلنا سمعنا عن الثورة اللى شغالة دلوقتى فى اليونان , وللى ما يعرفش نشرحله ببساطة

المكان : دولة اليونان الديموقراطية جدا
الزمان : من تلت اربع ايام كده
الحدث : واحد ظابط من الغلابة يا عينى من غير ما يقصد ضرب طلقة غلط والرصاصة جت فى صدر طفل برئ وقتلته فورا
رد الفعل :حصل خير الله ما اجعله خير ( اعذرونى مانا كأنى بحكى حلم ) زى ما بيقولوا كده فى بلاد الخواجات ثورة زى ثورة 19 اللى حصلت فى مصر لما الانجليز زعلوا الشعب المصرى او تقدر تقول لما الشعب المصرى قال فى صوت راجل واحد يا روح ما بعدك روح
المهم اللى حصل فى اليونان ثورة بكل المقاييس او زى ما بيقولوا فى الجرايد الرسمية وفى نشرة 9 (اعمال شغب) بس وهم بيحكوا فى النشرة عن الثورة كان كل كلامهم بيقول انها مش ممكن تكون شغب لان الشغب مش ممكن يخلى الشعب كله يتحد مع بعض ضد النظام , والشغب مش ممكن يخلى تلات جامعات تقفل حدادا واستنكارا , والشغب مش ممكن يخلى نص رجال التعليم فى اليونان يعلنوا المقاطعة 3 ايام عن التدريس , الثوار -ومش هقول المتظاهرين- حاصروا امس مبنى البرلمان اليونانى وزعيم المعارضة بيطالب الحكومة بالاستقالة و لا والموضوع وصل لحد ان التظاهر كان فى سفارات اليونان اللى فى لندن وبرلين ودول تانية

كله كوم واللى جايه دى كوم تانى , من فضلكم محدش يشتمنى ويقول عليا بخرف وان اللحمة اثرت على دماغى

اللى حصل ان وزير الداخلية هناك قدم استقالته
والله يا جماعة انا مش بهزر ولا اتلخبط فى اسم الوزير تخيلوا يا جماعة ان فى لسه بلاد متخلفة فى القرن الواحد والعشرين وزير الداخلية بتاعها بيستقيل
اوعوا تفهمونى غلط وتقولوا ………..
انا بس عايز احكلكوا كابوس.. (اقصد حلم تانى) بس اوعوا حد يفكر يقارن

المكان : مصر ام الدنيا
الزمان : من ييجى شهر تقريبا لحد اليوم
الحدث : 1 – ظابط غلبان فى اسوان قتل واحد برئ بسبب خطأ فى عنوان المداهمة
2 – واحدة ست فى اسيوط جالها سكته قلبية لان الظابط دخل عليهم الشقة غلط وهدد جوزها يا اما يطلع السلاح اللى مخبينه يا اما يعملوا …… مع الاسف
3 – الظابط اللى قتل لاعيب كرة اليد بتاع نادى الصيد لانه اتخانق مع اخوه (اخو الظابط) طبعا
4 – الظابط اللى قتل واحده فى البساتين لانها هزأته او بالبلدى (فرشتله الملايه )قدام اصحابه
5 – وكلنا سمعنا عن الظابط اللى قتل البدوى بتاع سيناء فى الاحداث الاخيره

رد الفعل : ………………………………………………………………. مفيش حاجه حصلت

انا عن نفسى ماعنديش كلام اقوله بس لو حد بيعرف يفسر الاحلام يقولى

ده المقال اللى كان مكتوب من سنة و طبعا كأن شيئا لم يكن احداث العنف بتكتر والفساد بيزيد وممكن نزود عن اللى تحت ده حاجات كتييييييييييييييييييييير

وبرضه لو فيه دكتور ياريت تخلوه يفوقنى من الغيبوبة

وربنا يكفيكم شر الاسفوكسيا